婦女基金會's 的頭像

致力促進社會對兩性平等的關注。

追求苗條身形的理想荼毒女性

女性具有自信,可以幫助她們明白到身材苗條不是美的最終標準。

繼意大利、西班牙及以色列,法國早前亦宣佈禁制過瘦的模特兒 ( BMI / 身體質量指數低於指定度數)走上天橋,原來法國立法當局發現國內有四萬宗厭食症個案,而十個個案當中九位是女性。

我們認為重整時裝潮流界崇尚模特兒愈見枯瘦的歪風已經是刻不容緩。各大時裝和護膚品牌的廣告,將本來已經纖瘦的模特兒,用電腦改圖技術令她們看起來更消瘦。更重要的是,以「瘦」為審美觀受害的不只是模特兒,而是對整個社會都造成非常重大的影響,更損害不同年齡層女性的身心健康。

我們身在香港也需要關注這問題。環顧周遭的廣告板、電視節目及社交媒體,無不是建構並強調「瘦就是美」的觀念。其中娛樂雜誌有百分之三十的版面都是針對女性的纖體廣告,慢慢滲透著令人「順應」的壓力。女性每天看著經改圖修飾的美女形象,耳濡目染下,會禁不住比較及提醒自己要修腰、豐胸、纖腿、美膚。而最可怕的是,這些所謂「美女形象」並不是真實的。我們從Dove 品牌的 「Real Beauty」的推廣活動,以及其他研究,正好看出這點。而香港進食失調中心於2012年的報告亦指出,減肥的女士當中,百分之十其實是體重過輕,百分之六十體重屬正常。

同一項調查發現進食失調病症數字正顯著遞增。在20到29歲年齡層中,臨床界定過輕的個案,由1995年至2010年間跳升一倍。過度減肥會令我們的健康承受深遠的後果,因為飲食失調可導致營養不良、骨質疏鬆症,甚至器官衰竭。

然而精神健康同樣受到影響,有五成飲食失調人士都可界定為憂鬱。女孩子會因自卑而卻步於社交活動。研究顯示,十人當中有六人會事事被動,不願參加班上辯論,甚至蹺課,就是為了避免別人注意她們的外表。

法國最近的立法或許會減輕女模特兒的壓力。而在香港,我們也可以多出一分力,爭取改變社會觀念,讓女性以真我自豪。譬如教育年輕一代的女生要有自信,如何應對譏笑和欺凌,跟她們灌輸外貌只是自我身份的一部分而非全部的信念。日常生活中,我們要以身作則,稱讚別人時,要基於對方的行事或價值觀而非外表;在臉書貼相時,不要過於輕率。讓我們攜手同心,正視此議題的宏觀影響,令女性不再為體態自卑而損害身心和前途。

**************************

婦女基金會每月在此專欄就性別議題發表文章。本文作者是周素媚和 Jess Jacobson。周是基金會的行政總裁,Jess 是項目及活動經理。

 

所有評論

地球生物 - 2015年09月25日 16:33

肥瘦都不美,都係種病!

但一般而言,

肥比瘦病態更明顯,

因為呢個富裕過剩的社會中,

要做到瘦重年紀己不少時,

真係一D都唔易!

,不過一般人都簡化了肥瘦的美學觀念.

簡化成体重的數字呀!

應係

肉骨脂的重量及体績比例.

 

 

tigeri - 2015年09月25日 20:35

減肥並不是問題, 減到變成過瘦先係問題.

不同於男人在社會中的壓力大部份來自賺錢的能力, 女人的壓力, 大部份就在於外表.

一個二十出頭, 花樣年華的女仔去競爭"市場"上既單身男, 你要同佢講內涵緊要啲, 佢可以點回應你?  講內涵, 係熟女既專利.  你同女人講要有自信, 唔好注重外表, 背後既意思其實就等於"你個樣唔掂".

另一方面, 減肥廣告, 無疑是很成功的.  當每個人都開始以為, 人人都改變, 自己唔變就會變相減分, 在拉curve效應之下, 每個人就要被迫去瘦 (情況就如虎爸虎媽).

而你們文中的所謂"以真我自豪", "年輕一代要有自信", 虛無縹緲成咁, 根本就係講咗等於無講.  至於所謂,"稱讚別人時,要基於對方的行事或價值觀而非外表", 更加係廢話.  等於你同女人講, 你稱讚男人時, 要基於對方的行事或價值觀而非有無樓, 係咪高富帥"一樣, 基本上唔會有幾多個女仔會啋你.

要改變社會既價值觀, 其實睇下政府既廣告就最有參考性, 例如垃圾蟲廣告, 隨地吐痰乞人憎廣告, 甚或是黃廢紙, 藍鋁罐, 啡膠樽廣告, 吸煙損害男人性能力等, 基本上都寫得很好.  要影嚮社會大眾, 不外乎果幾樣野, 社會角色, 群眾壓力, 高尚的動機等.  無論係咩角度都好, 最緊要實質.  "男人唔鍾意太瘦既女仔"就好實質.  "要以真我自豪", 就係廢話.

仲有, 唔好"一開波"就否定"瘦即是美", 你咁直接否定大部份人既價值觀, 人地仲邊有心機聽你講落去?

睇完你篇文, 我覺得你地真係好需要專業既marketing人仕幫幫手至得.

tigeri - 2015年09月25日 22:37

講多少少.

"苗條"不等於"瘦", 就如"豐滿"並不等於"肥".  你試下用"苗條"去google search網上的圖片.  你會發現, 沒有那張相的女人是瘦到皮包骨那種的.  甫一開始, 你個標題就已經有問題.  追求苗條身形的理想並不會荼毒女性, 反而會增強女性在社會上的競爭力.  過份追求才是一種荼毒.

Anyway, 我想講既係, 你既然想要用文字來傳播你的想法, 你的措詞就要準確.  你寫得含糊, 對方就有可能唔明, 甚至誤會你的意思.

另外, 透過"修腰、豐胸、纖腿、美膚"來upgrade自己的身型, 一點問題都沒有.  正如男人去練大隻, 練到手瓜"起展", 六舊腹肌, 甚至所謂人魚線, 只要唔過份, 何來問題?

最後, 談到"女孩子會因自卑而卻步於社交活動", 其實, 正如男人未必會瞭解女人日日挺住個36E既胸有幾辛苦, 其實, 你有無好好瞭解過, 一個因為體態而自卑既女仔, 佢既諗法係點?  你齋talk要"教育年輕一代的女生要有自信,如何應對譏笑和欺凌,跟她們灌輸外貌只是自我身份的一部分而非全部的信念", 你要點教育法?  你又能否明白, 當個女仔見到坐喺隔離個班花日日俾男同學圍住, 而自己就成日俾人笑係"飛機場", "微波仙子", 甚至"男人婆"果種痛苦?  乜你以為, 教佢外貌只是自我身份的一部(份)而非全部呢啲阿Q精神, 就可以令佢擺脫傷痛, 重新做人?  我會建議你, 去啲討論區睇下啲女仔點睇自己"個胸唔夠大", "俾男朋友話自己肥"果啲post.  你會對佢地既諗法瞭解更多.

最後既最後, 唔好成日講咩兩性平等.  你主觀地覺得兩性唔平等, 其實已經係一種偏見, 甚至係反向歧視.  男同女, 本來就應該係互補長短, 互相配合, 何需平等?  況且, 呢個世界, 從來女人嗌非禮啲人就一定會信, 男人嗌非禮就會俾人當痴線.  喺擇偶上, 從來追求果方都係男性, 從來女人絕大多數都係向上望, 要搵個條件比自己好既男人去"照顧"自己.  從來都只有女人怪男人無風度, 從來男女約會時, 只有男人唔俾錢會俾人叫賤男.  

而你地所謂既"男女平等", 我完全睇唔到你地有反對過上述既事實.  所以, 說白一點, 你地只係追求更多既權利, 更少既付出而已. 和"對兩性平等的關注", 完全沒有關係.

(坦白講, 人地美國講男女平等, 啲女人真係會去當兵走上前線和敵軍打肉搏戰.  雖然, 咁樣確實係自取其辱, 但至少令人心服.  至香港既所謂男女平權, 從來都只係單方面提升女權而已)

tigeri - 2015年09月25日 22:53

如果我係你, 我個selling point就唔會係"追求苗條是錯", 而係, "瘦不是美, 合適的身型比例, 突顯女性的曲線才是真正的美".  然後找些"男人不喜歡太瘦的女仔", "過份節食影響將來的BB"等案例來support自己, 咁先有說服力.

你所謂既教人"以真我自豪", 你可知道, 香港女仔俾人既印象是甚麼?  是"飛機場"和"港女".  我完全睇唔到, 香港女仔既"真我", 可以自豪既地方在那裡.

 

只有登入後或登記成為會員才能發表意見

版規:

  1. 網站編輯或網站作家開題,網友可回應。回應必須貼題,請勿重覆;勿發表誹謗,人身攻擊或不雅內容。
  2. 網站編輯有權發表或不發表網友張貼的內容。(請參閱議論守則)
  3. 開題之網友可編輯其在過去7天內發表之論題,或刪除相關回應。

查閱 FAQ

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。