李思行's 的頭像

以文會友、把歌傾情;追求真善美、常懷赤子心。

2016最佳演唱會

四月未過就選2016最佳演唱會?係,因為今年清明未到,筆者已經睇咗五個演唱會,足夠湊成一張候選名單,可以選出心目中嘅2016最佳演唱會嘞。
 
呢個演唱會,論歌手喺樂壇嘅地位,莫講話金針獎,就連最受歡迎(男)歌手嘅候選名單都未入過;論製作費,相信會係呢五個演唱會嘅包尾大班;論廣告贊助數目,零,連冠名贊助都無;論演出場地,比環仔伊利沙伯體育館重要細;論(台前可見嘅)團隊人數,成班樂手去飲坐埋都唔夠一圍,舞蹈員同和音歌手就更加欠奉;論嘉賓歌手,亦係無。話時話,除咗剛落機趕到所以無被安排(?)上台嘅何韻詩,重有邊個香港歌手敢撐呢位歌手場?所以(第三場)只得四位唔知識唔識唱歌嘅嘉賓喺度插科打諢。
 
至於個控制「台」啲儀器、電腦以至負責工作嘅人數,真係比喺一啲社區會堂搞嘅敬老聯歡晚會多少少咋!最後,當然係論入場樂迷人數啦,即係票房收入,陰功豬,三場爆滿都唔夠其他四個「候選單位」嘅任何一晚!
 
雖然係「低」成本製作、利潤亦唔慌會多,呢個演唱會嘅製作絕不馬虎,但依照一啲電影公司老闆嘅邏輯,咁「cheap」都可以係最佳演唱會?係呀,係最佳㗎;筆者唔係有病,亦有經過大腦至咁寫/講㗎。
 
顧名思義, 黃耀明麗的呼聲聽證會(演唱會)全晚嘅歌曲,除咗《問我》同為向哥哥致敬嘅《American Pie》,都係上世紀麗的電視/亞洲電視啲經典劇集主題曲/插曲。
 
開場無耐,明哥就演繹柳影虹嘅《換到千般恨》。當唱到「事已到此永難改,莫非世事常意外。。。誓約已經永不存在 」,筆者腦內即時閃出眼前香江景像。
 
 
依照明哥嘅講法,演唱會原本個「主角」係音樂,但適逢亞視喺首場演唱會嗰日真. 壽終正寢,所以因利成便,亦同時向麗的/亞視電視劇主題曲/插曲嘅靈魂人物黎小田、盧國沾致敬。
 
最後出嚟嘅結果係,一首又一首經典金曲,經過梁基爵重新編曲之後,加上佢嘅隊友同明哥落力演繹,效果出奇地好,每一首歌都仿似有咗新生命、充滿時代感、無曬「土味」, 就連坐喺旁邊,呢啲金曲上榜時可能都未出世嘅年青人都不時跟住音樂口噏噏、手指郁嚟郁去打拍子。與此同時,亦映照出今日部份中文歌,特別係電視劇集嗰啲,真係唔係嗰皮。
 
 
講翻上文提到嘅《換到千般恨》歌詞,回歸至今,唔少真. 港人都對絕大部份資深公職人士、代議士失望但又苦無對策/出路,充滿無力感而致怨氣日盛。雖然無水晶球,亦唔識合指一算,但今年九月肯定係一個換新天嘅日子,到時自有一番新景像,雖然唔會一蹴即就,但正如呢個演唱會入面嘅經典(另一種講法係老餅)歌曲,只要(多啲)有心人肯為呢粒東方之珠「重新編曲」、注入新元素,絕對可以令佢光芒再現,重踏康莊正路。
 
公平起見,順序簡略講埋其餘四個演唱會嘅觀/聽後感。
 
林子祥佐治地球40年演唱會,心思同製作水準都好好。主題由阿Lam受雙親啟蒙而對歐西流行曲產生興趣開始,之後去英美留學,對西方流行樂壇有咗更深入嘅接觸,到最後返港發展音樂事業,整體效果一氣呵成,選曲亦恰到好處,雖然有唔少英文歌(相信係有最多英文歌嘅粵語流行歌手演唱會),但阿Lam始終係番書仔、半個鬼佬,所以無中國人唱英文歌嘅缺點,座上樂迷都非常受落。蛋殼內嘅骨頭係演唱會主題以演唱者個人成長經歷為主,雖然完場前都有慨嘆今日香港變得無以前咁美麗,感染力已經略遜一籌。
 
 
溫拿NEVER SAY GOODBY演唱會,以校長喺樂壇嘅資歷、地位,竟然交一個真. 行貨嘅製作俾樂迷!主題同樣由出唱講到幾個已經可以半價搭巴士,但同阿Lam個流程一比,就顯得鬆散雜亂。至於個舞台backdrop,真係相形見絀,除咗「簡陋」,實在搵唔到更適合嘅形容詞。
 
入場時派嘅膠閃燈印有「溫拿精神」四個字,筆者諗咗好耐都唔知咩係溫拿精神,最後臨完場前從佢哋嘅對白得到啟示,原來就係要玩得開心,同最緊要嘅係,可以繼續搵銀。
 
 
陳慧嫻Priscilla-ism演唱會,亦係有水準、有誠意之作,等別係搵嚟80年代已經受一眾歌手推崇嘅舞台服裝設計師再度幫手,令演唱會極盡視聽之娛。可惜嘅係,就如Priscilla喺完場前講嘅心聲一樣,希望下次有新嘢俾到班粉絲。
 
 
 
林憶蓮PRANAVA造樂者演唱會,一貫嘅歌精舞勁,加上出色嘅backdrop投影,令人目不暇給,聽出耳油。於筆者而言,未能盡善盡美嘅係,同樣標榜音樂,有著名一線音樂人坐鎮,但感覺無明哥嗰個效果咁好,同埋無唱筆者至愛之一嘅《 一分鐘都市一分鐘戀愛 》。嘻嘻!
 
 
總結而言,演唱會、電影、舞蹈,話劇、舞台劇等藝術作品,技巧固然重要,但如果故事內容欠佳、無感染力、唔能夠觸動觀賞者嘅心靈,產生唔到共鳴,就等同一個有天使面孔魔鬼身材,但說話乏味、無內涵、無內在美、無靈魂嘅女仔一樣,去參加選美,入到三甲都唔會摘得后冠!
 
 
按:黃耀明同劉以達嘅「達明一派」曾經得過唔少歌曲及組合獎。
 
頭盔:點解睇溫拿?咁多年都未睇過、驚五年後佢哋唔再做、唔需要四出拜年、有內部「電視框」飛,啱曬筆者呢啲poor guy、窮撚。嘻嘻!
 
 
 
 
李思行個人面書生活時報 
 
《思行思語》專頁
https://m.facebook.com/思行思語-349247198508841/
 
《黃耀明麗的呼聲聽證會》相簿

所有評論

文見亂 - 2016年04月13日 00:10

哈哈!
思兄,好!
偏見!偏見!
不過我like!

李思行 - 2016年04月13日 00:15

文兄 好!

 

最佳,梗係自己最 like 嗰個喇,唔通幫人選咩?!嘻嘻。

李思行 - 2016年04月13日 00:18

(此留言己被博主刪除。)

李思行 - 2016年04月13日 00:37

帖頭相個度無得較,只可較相嘅大細。 {•︵•}

QQKK - 2016年04月13日 01:19

原唱好 D !!
柳影虹- 換到千般恨
https://www.youtube.com/watch?v=9mf5wlmiLt4

 

李思行 - 2016年04月13日 01:31

虹姐,我不嬲都鍾意,等別係佢唱《紅燭淚》時,嗰種風塵女子嘅味道,真係無人能及!嘻嘻。

 

View on YouTube

kychiu - 2016年04月13日 02:04

每年四月都有愚人節潑水節電影節,四月一號又撞哥哥祭日明哥演唱會同 十年 社區放映,哎吖做得邊樣!

 

多謝思行 兄補充空缺!

 

 

View on YouTube

 

黃耀明 - 忘不了的你+偶然 @ Legacy

 

忘不了的你 
 
 
曲 : 姚敏 / 詞 : 葉雯
 
 
明知道我不該愛你,為什麼好像有聯繫,
我也曾決意想忘記,一轉眼偏又想起你。
 
 
明知道我不該想你,為什麼好像有回憶,
我也曾決意想忘記,一轉眼偏又惦記你。
 
 
你莫非有魔力總叫我懷念你,懷唸著你的情意,
你莫非有魔力總叫我盼望你,盼望著和你在一起。
 
 
明知道我不該愛你,為什麼好像有聯繫,
 

 

我也曾決意想忘記,一轉眼偏又想起你。

李思行 - 2016年04月13日 02:09

kychiu 兄好!

 

不謝!四月(通常)有清明、復活同兒童節,真係好唔得閒㗎!嘻嘻。

kychiu - 2016年04月13日 02:14

咪即係死去活來乎?好"駭"呀!嘻嘻

e

escwan - 2016年04月13日 07:24

思兄好!

忘不了的你 ~(詹小屏唱)

https://www.youtube.com/watch?v=lWrKXp2Jo_s

She also sang the English version: Colour of the Rainbow.

 

文見亂 - 2016年04月13日 08:31

哈哈!
思兄都好富貴喎!

文見亂 - 2016年04月13日 08:36

忘不了的你 - 詹小屏

文見亂 - 2016年04月13日 08:55

林子祥 
 

丫嗚婆
作詞:林振強
作曲:Guida/Royster
編曲:鐘定一

男人 事實若你要開心活在世上
若你喜歡安安樂樂歌唱
別要揀天仙嬌娃做對象 盡力量別與她遇上

男人 事實若你要開心活在世上
若你喜歡安安樂樂歌唱
便要揀個丫烏婆泥做對象 萬事便自會多樂暢

如天仙美女永是太自私 如果約你永遠必定遲
常常令你似廢物拼命等 由朝企到朦朧子夜時
而丫烏對你永遠帶著痴 從不怪你平凡不合時
常常為你熨褲並熨睡衣 由始愛你愛到天裂時

男人 事實若你要開心活在世上
若你喜歡安安樂樂歌唱
別要揀天仙嬌娃做對象 盡力量別與她遇上

男人 事實若你要開心活在世上
若你喜歡安安樂樂歌唱
便要揀個丫烏婆泥做對象 萬事便自會多樂暢

更多更詳盡歌詞 在 ※ Mojim.com 魔鏡歌詞網 
甲:喂 阿老林呀
乙:乜事
甲:我個日撞到你個女人鍋
乙:系咩
甲:嘩 乜佢甘醜樣嫁
乙:不過佢熨個D睡衣 好鬼靚Ge播

和丫嗚你會快樂過日子 從今放棄美女都未遲
由人為美女拼命拼命追 由朝索氣索到畢命時

*男人 事實若你要開心活在世上
若你喜歡安安樂樂歌唱
別要揀天仙嬌娃做對象 盡力量別與她遇上*

If you wanna be happy for the rest of your life
Don't you make a pretty woman your wife
So for my personal point of view
Get an ugly girl to marry you

*男人 事實若你要開心活在世上
若你喜歡安安樂樂歌唱
別要揀天仙嬌娃做對象 盡力量別與她遇上*

 

文見亂 - 2016年04月13日 08:59

陳慧嫻 - 幾時再見 1989 (18) - 人生何處不相逢

ray1129 - 2016年04月13日 10:05

在下就比較喜歡童麗演繹的《換到千般恨》。

 

View on YouTube

李思行 - 2016年04月13日 10:46

各位早晨

李思行 - 2016年04月13日 10:50

escwan 好

 

多謝點歌

李思行 - 2016年04月13日 10:51

文兄何出「好富貴」一語?

李思行 - 2016年04月13日 10:54

ray 兄好。

 

童麗唔係我杯茶;有 FB 友介紹鄭子固版本。

View on YouTube

O

Old Cake - 2016年04月13日 10:58

請問,現時貼 youtube 歌,是否直接用youtube的"嵌入" code,要用 code converter 嗎?

李思行 - 2016年04月13日 11:13

Old Cake 兄好。

 

要用呢個 converter,

http://www.gorissen.info/Pierre/files/YouTube_code.htm#

 

Paste youtube 條片嘅 url 落去跟住按 generate 

O

Old Cake - 2016年04月13日 11:30

平權,男可幽怨,女可壯烈

View on YouTube

O

Old Cake - 2016年04月13日 11:39

Thanks 思行兄

View on YouTube

文見亂 - 2016年04月13日 11:50

哈哈!

思兄,你四個月睇五個演唱會。

我一年只可以睇一個演唱會。

你話你喺咪好富貴啦。

李思行 - 2016年04月13日 12:14

我係坐比半山高尚住宅區更高尚嘅山頂㗎!哈哈

O

Old Cake - 2016年04月13日 13:16

kychiu - 2016年04月13日 13:50

上次睇Madonna,天價飛,都仲係好似望緊維港對岸咁,陰公豬,睇碟好過

kychiu - 2016年04月13日 13:52

其實一把年紀仲扮少女.....純粹路過,大家唔好打我喔!

李思行 - 2016年04月13日 16:55

Old cake 兄,不客氣。

李思行 - 2016年04月13日 16:58

娜姐門票嘅價錢,真係令我呢啲poor guy卻步。嘻嘻 !

QQKK - 2016年04月13日 19:55

ray1129 Bro  : 比較喜歡童麗
但童麗晤 G典解唱歌巧重呼吸聲 !!!
 

 

QQKK - 2016年04月13日 19:57

換到千般恨女人歌, 女人唱巧D !! XDDDD

QQKK - 2016年04月13日 20:10

林子祥 - 似夢迷離

 
 

李思行 - 2016年04月13日 22:16

童麗俾我嘅感覺,同泡菜啲靚仔靚女樣一樣,刻意咗,唔自然。

守真居士 - 2016年05月08日 02:00

Agreed much, 溫拿NEVER SAY GOODBY演唱會,以校長喺樂壇嘅資歷、地位,竟然交一個真真真行貨嘅製作俾樂迷!鬆散雜亂,真係相形見絀,除 咗「簡陋」,實在適合形容 only rubbish嘅。They totally destroy their image since they actually didn't respect the payee .  After that play I think it is the time to  SAY GOODBY to their 演唱會 in future . Only mercenary joke.

只有登入後或登記成為會員才能發表意見

版規:

  1. 網站編輯或網站作家開題,網友可回應。回應必須貼題,請勿重覆;勿發表誹謗,人身攻擊或不雅內容。
  2. 網站編輯有權發表或不發表網友張貼的內容。(請參閱議論守則)
  3. 開題之網友可編輯其在過去7天內發表之論題,或刪除相關回應。

查閱 FAQ

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。