李思行's 的頭像

以文會友、把歌傾情;追求真善美、常懷赤子心。

挾神自重

先行利申,尊重神嘅追隨者,討厭神嘅代言人。

 
小學四五年級時,有同學叫筆者去主日學,當時家貧,星期日無得學人上茶樓飲早茶,所以就跟佢去咗兩三次,但唔知點解,每次去完之後都有種周身唔聚財嘅感覺,所以自此至今都無再去過同類活動。
 
人愈大,接收到同宗教有關嘅資訊就愈多,亦唔知點解,負面嘅總係比正面嘅多。遠嘅就有性侵兒童神職人員受到教會高層「包庇」、反同性戀神職人員原來係同性戀者,近嘅例子就有「不務正業」,以干涉他人房事為「工作使命」、重建教堂要信眾捐獻(市儈嘅講法就係夾錢、籌期/籌旗、集資、另類上市)合共十億港元、教會領袖政治獻媚、入住海景豪宅重振振有詞(教會物業係咪用信眾嘅捐獻買?)、 對於鄰近地區教堂嘅十字架被強拆視若無睹等等同佢哋終日掛喺口邊話神要佢哋點點點嘅行為皆背道而馳。
 
四年前同曾經係教徒嘅朋友重遊羅馬但就首度參觀梵蒂岡聖伯多祿大教堂(Basilica di San Pietro 又名聖彼得大教堂),對殿內嘅用料、裝飾、雕像、壁畫以至各種小擺設,真係可以用「嘆為觀止」去形容,感覺比北京故宮、法國梵爾賽宮。。。輝煌得多(唔知係咪同保養有關);以四五百年前嘅人工計算可能無咩大不了(未能搵到相關資料),但換轉今日,建築費用相信會係天文數字!
 
唔清楚有無人質疑過一個以「愛」先行嘅宗教用咁多人力、物力同財力去起一座教堂(意大利總共有幾多座咁金碧輝煌嘅教堂?),但中世紀時政教合一,有財就有勢、有勢就有財,為咗彰顯教會、教皇擁有至高無上嘅權力而不惜工本,前後用百多年嚟起一座「窮奢極侈」(同遊朋友嘅觀後感)嘅教堂係可以理解,但十六世紀時(大教堂建自1506年,於1626年完工),政教合一已經開始「不合時宜」,重有無咁嘅必要?
 
叉開一句,參觀完大教堂之後,該位朋友話見過咁多國家嘅男人,覺得天下俊男盡在意大利、意大利俊男盡在羅馬、羅馬俊男就盡在梵蒂岡。哈哈!
 
今日,雖然政教合一已經成為歷史名詞,但心底裏仍然抱有呢種心態嘅人相信亦大有人在,否則點解要花十億去重建教堂?今日一啲宗教、神職人員為何不單止對佢哋嘅弟兄姊妹「循循善誘」之餘重經常對非教徒「指指點點、說三道四」?正所謂吹皺一池春水,羊以外嘅動物鍾意食咩、鍾意行去邊關牧羊人咩事?!
 
羊係食草嘅動物,牧羊人「帶領」羊群嘅工作相信唔易做,所以要食得豐富啲亦無可厚非,但如果羊唔會「生產」羊奶,重有幾多人會去牧羊?又如果無咗神嘅呼喚,牧羊人嘅地位重得以保持同有豪宅宿舍嗎?
 
有位長輩自大學畢業之後就喺教會學校任教至退休,期間佢嘅家人分別一一受洗,唯獨佢至今都感受唔到神嘅呼喚。有次講起呢個話題,佢話喺教會學校四十幾年,咩都睇得一清二楚云云。
 
言歸正傳,喺香港不時聽到張三話神叫佢乜乜柒柒、李四又話神叫佢勿勿柒柒,無他嘅,如果你記得歷史上有個以挾天子以令諸侯而名留史冊嘅梟雄(奸雄),你咪唔多唔少都睇到呢啲人個心態囉。
 
奉天承運,龍椅上嘅皇帝詔曰。。。向信壇仝人、各位新知舊雨拜個早年,恭喜發財、萬事如意、龍馬精神!欽此!
 
 
《思行思語》專頁
https://www.facebook.com/思行思語-349247198508841/

所有評論

李思行 - 2017年01月17日 10:33

 
上文早前構思,一路未曾就筆,適逢近日又有人將神嚟「炒作」,所以的起心肝加入尾段草草完成,而下文就係適逢多個月前喺網上讀到複製落嚟,可惜忘記咗喺邊度睇到、邊個寫同漏咗複製連結,如有知道,歡迎補漏。
 
 
【Reformation 2.0】
 
基督教其中一樣最令我不解的,就是牧師制度。根據聖經,耶穌以神化為肉身接觸人,擔當神人之間的橋樑。從此人可以直接與神溝通,不再需要祭司做中間人。所以新約聖經說「信徒皆祭司」。
 
但眾所周之,後來的天主教搞出了教宗/主教/神父這些東西出來,把信徒又再分為神職人員和普通信徒兩個階層。於是,馬丁路德的改教(Reformation 1.0)便從新提倡「信徒皆祭司」,告訴人們,這些主教神父,都是不必要的。同時也提倡人可以自己讀聖經(之前係神職人員才有資格,普通信徒只能乖乖聽道)。
 
好了,諷刺的是,歷史又再重覆。改教後的基督教會,又弄出個牧師制度。分別只是牧師可以結婚(可能前車可鑑:神父出名搞男童)。但這豈不是只是又試換湯不換藥?無論是基督教還是天主教,都把聖經的話當耳邊風了。聖經記載的確有教會領袖這東西,但聖經並沒有叫你把教會領袖塑造成祭司的樣子:聽道一定要聽他的;教會的事務也要聽他的;無論紅白二事要他經手才合法,諸如此類。
 
耶穌和馬丁路德做的,是給信徒充權。但無論是天主教還是基督教,這幫混帳做的,是把權利又從信徒中取回。一味叫你順服,聽話,守規矩;聖經你可以自己讀,但解釋權在神職人員手上;你不聽話的話,婚也沒得你結,生下來的兒子不能就讀基督教名校,死後也沒有基督教永遠墳場給你安葬。所以,其實不難明白為什麼搞來搞去都是回到舊約的老樣子。因為誘惑實在太大。
 
我認為,要改革的話,須徹底實踐「信徒皆祭司」,給信徒充權。教會是個平等、互相扶持的群體,並不存在階級。若然連同把教會「非硬件化」,這會是把基督教完全「非建制化」的行動。為什麼?因為建制化後的基督教如同觀奇洋服:講一套做一套,整個社會都有眼見。教會沒錯是很有勢力,個別信徒卻是個個軟弱無力,靈性枯竭。上帝看在眼裡,只會在盤算著,幾時去收拾這幫奉衪的名搵食的惡徒。
 

Big Mac - 2017年01月18日 00:13

BTW, 梵蒂岡是另外一個國家來的,在意大利內,但不是意大利的一部份。

李思行 - 2017年01月18日 00:24

大麥哥 好,有華人嘅地方就係中國嘅土地。哈哈!

e

eddybb - 2017年01月18日 02:00

思行兄好,

當政教合一,災難發生。近日香港什麼人什麼都以神之名,難看之極,思歪如是,奶媽如是,薯片如是。

p

paulychan127218 - 2017年01月18日 04:55

思行兄早晨......

原來教會有咁多野......受教了....多謝.......一笑

文見亂 - 2017年01月18日 07:11

哈哈!
思兄,你好!
從細到大,都非常相信耶撚最是幫duck手。
每每做了什麼衰野不安,有愧於心都第一時間走去向神父告誡,久而久之令本人做起壞事起來從心所欲,心安理duck。
從窺女孩洗澡,跳灰,帶粉等等都是奉了耶撚在耳提夢命所為。

侈哆 - 2017年01月18日 07:32

「尊重神嘅追隨者,討厭神嘅代言人.」理直言真!

 

「張三話神叫佢乜乜柒柒、李四又話神叫佢勿勿柒柒... 」,如果言者是梟雄奸雄猶不太過,最令人不齒是似流氓爛仔小嘍囉街市去收數,不敢自己撻朵指鼻,搬個叔父名號去嚇街坊.

文見亂 - 2017年01月18日 07:37

Only Yesterday -- Carpenters

 

 

文見亂 - 2017年01月18日 07:49

 

 

Do ( original ) - We're in heaven

鄭立勳 - 2017年01月18日 08:03

思行 兄,

現世代以神之名仍然用得,且官場人士爭著用,真意外,是否沒有能力想到點丶理直氣壯的藉口。

文見亂 - 2017年01月18日 08:04

Everly Brothers - Let It Be Me Lyrics

石亦云 - 2017年01月18日 08:05

李語錄 :  “記得歷史上有個以挾天子以令諸侯而名留史冊嘅梟雄.”

---

石仔批曰:

記住今日又有個想”以挾天主以令豬猴而名留史冊嘅阿太”.

---

文見亂 - 2017年01月18日 08:20

Joe Hisaishi - Howl's Moving Castle

文見亂 - 2017年01月18日 08:22

哈哈!
錯link。
Joe Hisaishi - Howl's Moving Castle

文見亂 - 2017年01月18日 08:36

黃河鋼琴協奏曲 The Yellow River Piano Concerto

文見亂 - 2017年01月18日 08:50

諏訪內晶子 -《梁祝小提琴協奏曲》

文見亂 - 2017年01月18日 09:33

哈哈!
信念!
共產黨及梵蒂岡都有一個共通性  信念!(洗腦)

文見亂 - 2017年01月18日 09:42

Stairway To Heaven

李思行 - 2017年01月18日 10:28

各位 好,早晨!

李思行 - 2017年01月18日 10:32

eddybb 好

噚日bb 生咗個 bb,  唔知佢(哋)要唔要感恩呢? 嘻嘻!

李思行 - 2017年01月18日 10:34

pauly兄 好

 

有三個人或以上嘅地方就有政治

李思行 - 2017年01月18日 10:36

文 兄好

 

咁咪即係耶撚旁身,世界通行?哈哈!

李思行 - 2017年01月18日 10:40

侈哆 兄,眼情景像正係群丑圍醜,亂舞不停。

李思行 - 2017年01月18日 10:42

立勳 兄,依家啲官係理曲氣壯,愈曲愈壯。

李思行 - 2017年01月18日 10:47

亦云 兄,阿太個記招內容空洞,唔搬天主出嚟,何來焦點?

ray1129 - 2017年01月18日 13:15

思行會長,好耐無見!
 
其實無論是借宗教或是道德之名,這類人最令人討厭的地方就在一個「偽」字。他們不是為自己所作之惡,找個藉口,就是為自己逃避現實,找個借口。
 
咁耐無見,貼首高魯泉的《滿天神佛》替會長這樓助興。
 

View on YouTube

李思行 - 2017年01月18日 13:48

ray 兄 好!

嗰啲人將神當作一塊遮醜布。

多謝好歌!

周容 - 2017年01月18日 23:17

思行 兄好

 

教會係咁,愛國教會係乜樣?

唔怪得人大要解釋基本法啦,不過我認為教會都未係最難頂,最難頂係有組織話係你祖宗、娘親、老豆,走都走唔甩。

李思行 - 2017年01月18日 23:23

周容 兄好

係,重犀利過如來佛嘅五指山、孫悟空頭上嘅金鋼圈。

釗藝 - 2017年03月02日 00:26

好耐冇上來浦,好在仲有熟人在。不過文就冇搵到。嘻嘻!

只有登入後或登記成為會員才能發表意見

版規:

  1. 網站編輯或網站作家開題,網友可回應。回應必須貼題,請勿重覆;勿發表誹謗,人身攻擊或不雅內容。
  2. 網站編輯有權發表或不發表網友張貼的內容。(請參閱議論守則)
  3. 開題之網友可編輯其在過去7天內發表之論題,或刪除相關回應。

查閱 FAQ

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。