香港是我家 We, the people

搭地鐵買廁紙

【聲明:話劇全屬虛構,如有雷同,實屬巧合】

本話劇主人翁是雙木太太,她在本港經歷了數十寒暑,當職業保姆三十多年,剛剛辭去份筍工,準備幹一番大業,以報國報港。

第一幕地點:某地鐵站

雙木太太:(自然自語)講起失禮,喺香港幾十年都未搭過地鐵,今次係第一次,好在老公同我買咗張地鐵飛,唔駛等我周圍騰,唔知係邊度買,老公抵錫。

雙木太太:(自然自語)咦,嗰邊有個閘口無人啵,等我入閘先,我要快過嗰個胡鬚佬。

(雙木太太用張卡猛拍閘口都沒有打開)。

雙木太太:(發晒炆憎)真豈有此理,點解呢部壞鬼嘢唔郁架。如果我做到特首,你想加價,好難啦。

(一地鐵職員見狀,行過來)。

地鐵職員:老太,有乜嘢幫到你?

雙木太太:你呢架爛鬼機唔俾我入閘。

地鐵職員:老太,唔好意恩,呢邊係出口,入閘係嗰邊。

雙木太太:我好老咩!開口及着脷。

雙木太太:係喎,嗰邊先係,乜我睇唔到嗰EXIT牌,咁戇居。

(雙木太太於是急急腳走過去另一邊,拿起張卡又喺咁拍拍拍,但可惜閘仍然打不開)。

雙木太太:喂,嗰邊嗰個哥哥仔可唔可以過嚟,我都係入唔到閘。

(地鐵職員都算唔話得,快速跑過來)。

地鐵職員:太太,可唔可以比張卡我睇吓,睇吓點幫到你。

(雙木太太將卡遞給地鐵職員)。

地鐵職員:噢,太太,你張卡唔係八達通嚟架,只係信用卡嚟,所以閘口唔郁。

雙木太太:喺喎,唔怪得知啦。(於是拿起手袋,東找找,西找找,都找不到八達通卡)。哎喲,都唔知塞咗去邊。

地鐵職員:太太唔緊要,你可以買過張八達通,即刻入到閘。

雙木太太:唔買啦,費事買雙重,咁鬼麻煩,我去搭電車巴士,杯葛你地鐵。

地鐵職員:太太,幫唔到你,再見!

(雙木太太頭也不回,急急腳離開地鐵站)。

【落幕】。

第二幕地點:某便利店

雙木太太:我要買一捆廁紙,幾多錢?

便利店職員:太太,我哋冇廁紙賣啵,紙巾就有,你買唔買。

雙木太太:(發晒爛渣,大聲講)有冇搞錯,廁紙都冇得賣,點做生意架,仲講乜廿四小時營業,廁紙係必需品嚟架,叫你老闆入貨啦。

雙木太太:(繼續發勞騷)哥哥仔,你識唔識嘢架。話你知,我做奶媽做咗三十幾年,食鹽多過你食米。唔係跨口,我湊大幾多百厭仔、百厭女,幾時輪到你教我。紙巾只係用嚟抹咀,廁紙要嚟大便,分得好清楚,明未?

便利店職員:咁阿,咁報紙幫唔幫到你。

雙木太太:哈,哥哥仔,你又唔蠢得晒,比你叻番次。比份【生果報】我,我最憎【生果報】,所以我買嚟第二樣用。佢成日唱衰我老闆,搞到佢意興闌珊,做埋呢幾個月就摺咗間公司。搞到我提早要辭職,諗住頂佢嚟做。點知聽講嗰個胡鬚佬話有興趣同我爭。

便利店職員:嘩,咁傳奇架,我想知多啲。

雙木太太:嗰間公司係服務性行業,我老闆有嗰大老闆係內地話晒事。我老闆比客批評,話佢只顧大客,唔多理啲小客仔,大細超,好唔公平,所以佢就唔想同大老闆續約囉。聽講胡鬚佬有好大抱負,佢小時候係【喇沙仔】,又係美國哈佛畢業,又話識乜嘢【洪拳】功夫,話【幾打得】喎。好在我都【好打得】,我都唔弱,但我學嗰啲係旁門左道,我都有能力同佢鍊過。

便利店職員:唔好意思,而家已經好夜,【生果報】一早賣晒,而家淨係有【大X】同【文X】,仲有成大疊,好滯銷。你要唔要。

雙木太太:咁阿,我買份拍拖報,兩份愛晒。

便利店職員:唔得噃,太太,我哋唔賣拍拖報,因賣唔晒報館收番。

雙木太太:好啦,是但比份我,反正我都係攞嚟咁用,頂住檔先好過冇。快啲,我急用架。

便利店職員:God Bless You ! 希望你打贏個胡鬚佬。太太慢行,出面仲修緊路。

雙木太太:多謝,我都希望係【上帝意旨】。

 

(雙木太太一踏出門口就踢到舊大石,大吉利是)。

【落幕】。

所有評論

星斗市民 - 2017年01月31日 00:26

各位壇友,此話劇志在讓你會心微笑,新年流流,大家開心吓,唔好閉翳。欲知後事如何,下回分解,請阿。

星斗市民 - 2017年01月31日 00:29

獅子山下:
升斗巿民要人人有工開,人人有飯開。
小生意人要日日有檔開,日日有單開。

星斗市民 - 2017年01月31日 23:30

初三赤口,葉劉批評車公廟解籤佬說她曾被麒麟撞倒會衰三年,特首夢無望,話解籤佬犯規。其實葉劉何須大動肝火,早前黃大仙夠話佢會爆大冷,贏得寶座歸,佢又信到十足?現實歸現實,而家無論早前話支持佢嘅鄉下佬,漁夫,農夫都俾奶媽氹掂,已被撬牆腳,要怪只可怪奶媽不仁不義,解籤佬只不過為兩餐直話直說,何罪之有?

星斗市民 - 2017年01月31日 23:42

奶媽日前解畫,話佢只會做大事,屋企啲小事會倒瀉籮蟹唔出奇。可憐乜嘢係【見微顯著】咁簡單嘅道理都唔識,點做大事啊!

養珠樓主 - 2017年02月01日 04:02

『奶媽日前解畫,話佢只會做大事,屋企啲小事會倒瀉籮蟹唔出奇。』

 

梁振英不是說『民生無小事』麼?

星斗市民 - 2017年02月01日 06:27

【梁振英不是說『民生無小事』麼?】
梁特首素來不知人間疾苦,其有了解市民生活乎?只知周旋於富人商家之中,聽命於中央中,活在自己的世界裡,四年內幫小市民做咗啲乜事,呢啲民生小事佢唔會理,做親都係【大龍鳳】,搞到香港點樣,香港人應該心照。

石亦云 - 2017年02月01日 14:26

星語錄 :  “買廁紙”

---

石仔批曰:

大佬呀!

雙木太太朝早畀人爆話”中央唔任命”,咩鑊咩到應.

公關教路,老作講買廁紙”.

一班報紙佬電台佬,掛住笑”廁紙”,唔記得”任命”追數.

你話邊個懵時邊個醒.

---

PBrega - 2017年02月01日 16:23

薈景軒是服務型公寓,向管理處拿廁紙亦可以。唔使買了。

靜靜一天 - 2017年02月01日 18:14

鄭女士扮風脆幽默,弄巧成拙!

星斗市民 - 2017年02月01日 23:34

薯片叔叔道行夠,以靜制動,沉默是金,高唱 The Sound of Silence,高招。呢一招唔適合口水多過茶嘅女選手,所以頻頻出錯,講多錯多自然難免,自重。

星斗市民 - 2017年02月01日 23:52

【一班報紙佬電台佬,掛住笑”廁紙”,唔記得”任命”追數.你話邊個懵時邊個醒】
【憲制危機】呢單嘢,傳媒唔追數,大把人/官會睇住,䀹到實.,中央會研究此消息真偽,會否引起社會不安,可大可小,政治人物慎言最重要,唔係噏得出就噏。

PBrega - 2017年02月01日 23:53

哈哈哈哈哈哈!
啊呀!我們都誤會了,因為這是「舐痔」的必需品?

只有登入後或登記成為會員才能發表意見

版規:

  1. 網站編輯或網站作家開題,網友可回應。回應必須貼題,請勿重覆;勿發表誹謗,人身攻擊或不雅內容。
  2. 網站編輯有權發表或不發表網友張貼的內容。(請參閱議論守則)
  3. 開題之網友可編輯其在過去7天內發表之論題,或刪除相關回應。

查閱 FAQ

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。