方卓如's 的頭像

《信報》專欄作家

過程重要過結果

《信報》方如玉帥:「方帥,有排見你唔到,有乜好嘢分享吓?」

「草蜢仔,半年好快就過,樓市股市升足半年,傳說中嘅大冧市未出現,而且冇跡象會出現,但係你未必搵到錢。一來你以為就跌,唔咁瞓身;二來你手上有嘅貨,又驚沽咗買唔番。所以,好多人只係有小量紙上富貴,再多啲嘅都唔敢沽貨套現。正所謂有得睇冇得食,就係呢啲。上半年升市,但係開心嘅人唔多,呢啲場面最令人沮喪。」

「咁下半年又應該點?」

「人係冇預測能力,輸得最甘嘅人必定係預測得最多。股市升足5個月,超過大時代前嘅水平,全憑騰訊(00700)比起兩年前更加強勢,以及換走咗啲弱勢股。但係呢5個月,只係啲大藍籌曉升,恒大(03333)可以升一倍,但係其他細價股冇乜動靜,除非賣咗殼轉咗手。炒開股票嘅人其實冇乜點炒股票,股市絕對唔似炒到爆就嚟要冧。2017年如果由估計中嘅大冧市變成大升市,咁就真係冇路捉。但係呢半年嘅事實證明,冇人想沽冧個市賺錢。等冧市掃平貨,可能有排等。」

「唔係喎,我見好多傳媒都話遲早跌市喎。」

不斷估錯已經輸晒身家

「草蜢仔,同你過年玩射龍門一樣,見到隻四仔估大,見到隻十就估細,贏面自然大。市升估跌係安全過市升估升。但係傳媒睇跌睇足半年,次次都話九十年代日本翻版。最後可能估中,但之前不斷估錯嘅時候已經輸晒你副身家。投資唔係睇最後結果,係睇過程。過程出錯,你冇命睇到啱嘅結果。投資係一個問過程多於問結果嘅遊戲,所以你唔使有預測能力,最緊要有應變能力,做啱晒過程,結果並非如你所料,一樣可以贏錢。」

「過程緊要過結果?第一次聽,方帥你係咪吹水?」

「草蜢仔,等你有我咁上下年紀,你就知道,結果你係控制唔到,過程先係你掌握之內。千算萬算, 最後未必如你所願。慢慢做,一步步,審時度勢,忠於自己,相信最後嘅結果就係你最理想嘅收穫,咁你就開心好多。好多人行咗半世冤枉路,最後先發覺冇前面嘅浪費時間,就冇以後嘅修成正果。呢啲嘢,到你周身傷痕,自然會明白。」

「方帥你果然大個仔,講句嘢都老成過人,恭喜晒。」

編按:方卓如外遊,專欄下周一起暫停,本月26日復刊。

(節錄)
 
只有登入後或登記成為會員才能發表意見

版規:

  1. 網站編輯或網站作家開題,網友可回應。回應必須貼題,請勿重覆;勿發表誹謗,人身攻擊或不雅內容。
  2. 網站編輯有權發表或不發表網友張貼的內容。(請參閱議論守則)
  3. 開題之網友可編輯其在過去7天內發表之論題,或刪除相關回應。

查閱 FAQ

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。