李思行's 的頭像

以文會友、把歌傾情;追求真善美、常懷赤子心。

發展就是硬道理

長情原來係罪過,節儉原來係缺德。

 

話說日前換手機,連鎖電器鋪個售貨哥哥仔碌完卡後就例行幫我貼芒貼,跟住過電話簿資料。下載完啲電話去張micro SD卡之後,唔知咩原因部新機讀唔到張卡,於是過落張sim卡度,點知當佢拎張sim卡出嚟之後就同我講:你要換張nano卡喎,你去你個電訊商度換咗先返嚟幫你搞喇,行人專用區有佢哋嘅鋪㗎。

 

於是由街頭行到街尾,電訊商個哥哥幫我換完卡之後我順便問佢可唔可以幫我過埋啲電話。佢click幾click、睇兩睇,話我啲電話喺「支貓」度,唔駛轉喇。

 

出咗門口邊行邊檢查,發覺新機電話簿數目唔齊全。返到電器鋪,哥哥仔用佢哋張micro SD卡但就輪到我部舊手機讀唔到佢張卡(太大唔支援,so sad)。我話係咪可以用藍牙,佢話藍牙有限制,我舊機太多電話云云(我係諗住自己搞,可能佢亦唔想再花太多時間)。

 

唯有做日本首相(左騰右騰),騰翻去電訊商度。好在係大公司,店鋪樓上就有技術支援。個技術員哥哥仔嘗試用網絡同步幫我搞,但(佢話)慢到飛起,於是改用藍牙。佢邊等藍牙邊同我打牙骹:你部機比較舊,行得唔夠快,要啲時間(雖然係跌咗價先買,剛才售貨哥哥仔亦話我部機無得trade,但假假地都係某大牌子五年前嘅旗艦機嚟㗎!)。我話:係呀,用咗四年。技術員哥哥仔跟住話:依家無人用手機用四年㗎喇,好多嘢都跟唔上㗎喇,舊電都脹脹哋喇(點解依家啲手機唔俾人換電?)!

 

題外話,同時間旁邊有位阿嬋問另一個技術員,話見人哋啲手機裝到好多「鴨屎」,點解佢嗰部唔得。個技術員哥哥睇兩睇佢部機,話:人哋啲機貴(容量大)好多㗎!我差啲笑咗出嚟。哈哈!

 

前後「折騰」咗兩個鐘(由有日光搞到天開始黑)終於搞掂,於是打道回府,食過飯後就下載慣用嘅「鴨屎」,到第二日先有時間去深水埗買過幾條Type C線,真係好唔得閒,好彩部新機頭幾日都幾OK,比舊機暢順得多之餘重成日都唔駛用尿袋。

 

話分兩頭, 點解電子產品硬件,無論係插頭、線、卡。。。都要不斷有新格式,當年啲開發人員無諗過呢啲問題嘅咩?另外,其實電器鋪嗰哥哥仔都算幾好服務,所以返歸時經過本想同佢講聲搞掂咗兼再唔該佢,但佢唔知係啱啱收咗工定去咗食飯,唯有下次,如果佢認得我嘅話。嘻嘻!

所有評論

李思行 - 2017年08月03日 22:52

FB : 李思行

https://www.facebook.com/sixing.li?ref=bookmarks

FB專頁:思行思語 https://www.facebook.com/pages/思行思語/349247198508841

周容 - 2017年08月04日 01:39

思行 兄好

 

睇到我一身汗。嘻嘻!

唔記得出自某電影對白:你自己純情就唔好話人賤格。

李思行 - 2017年08月04日 01:52

周容 兄好

聽日放完假我又要返入去博物館開工,唔知幾時再出嚟㗎喇。嘻嘻 !

李思行 - 2017年08月04日 02:08

話時話,無返嚟半年,發覺自己個「餐牌」只得最近三年嘅博文,2015年1月之前嘅無曬嘅?

 

 

周容 - 2017年08月04日 02:49

係喎,我嘅顯示到2014,但係翻頁可以去到2010,之前嘅就唔見晒。

 

通知都冇一聲!

李思行 - 2017年08月04日 02:59

唔講(通知)即係無咗,哈哈!

黎自立 - 2017年08月04日 09:29

你真傻,賣部四年前的產品,日新月異呀。

李思行 - 2017年08月04日 11:27

(此留言己被博主刪除。)

李思行 - 2017年08月04日 11:39

賣得出四年前(其實係五年前,有人閱讀同理解能力都可能有問題)產品係商業奇才,買嗰個至係傻。

李思行 - 2017年08月04日 11:59

其實買嘅都唔一定係傻,總有佢嘅原因,所以先有二手市場,最新嘅Win10都有人唔鐘意,仍然愛用Win7。

QQKK - 2017年08月04日 12:21

" 你真傻,賣部四年前的產品,日新月異呀 "

 
...................

真係白豬.....大把人收呢去非洲

李思行 - 2017年08月04日 14:05

今日香港落得如此田地,其中一個原因係部份代議士愛信口雌黄,少做實事。

ray1129 - 2017年08月04日 14:12

思行會長,你好!今天你放完假後,大家又唔知幾時可以再見到你?
 
現在換手機就如從前換私人電腦般惱人,一大堆的資料要 backup & restore,一大堆的週邊部件要更換,非常耗費時間。可有想過利用手機商提供的雲端服務去做手機資料的 backup & restore,這該能節省不少時間。
 
一部手機能用上五年,會長該是個非常珍惜身邊事物的人,那就貼首張學友的《吻別》送給追隨了你五年的旗艦機。
 

View on YouTube

鄭立勳 - 2017年08月04日 14:14

思行 兄,

科技日新月異, 讀/從事科技的最辛苦, 得不停跟進. 現在才明白讀文學丶哲學丶歷史的好處.

李思行 - 2017年08月04日 16:10

ray 兄你妳 !

多謝閣下心意。今人另一煩惱係要記一大堆passwords。
有你哋呢班老友捧場,定必盡量抽空上嚟,嘻嘻 !

李思行 - 2017年08月04日 16:13

立勳兄好,

人係愛自㝷煩惱嘅動物。嘻嘻 !

Barwon - 2017年08月04日 16:16

追逐日新月異,得先打量自己能力,「追得到也未必好,追唔到(激壞腦)」。手機只有兩個 apps,whatsapp、wechat 是也,已覺 'more than I asked for'。

PBrega - 2017年08月04日 16:17

發展什麼?淫業?
一班狗屁不通的山寨王,被老外牽著鼻子走,還自以為是。

PBrega - 2017年08月04日 16:22

短訊本來是要收費的,現在免費、收垃圾,你們這些山寨王,不覺得公平嗎?

李思行 - 2017年08月04日 16:32

話說買條Type C OTG,由手機過file去手指要權限,搞咗兩日都唔得,以為平嘢無好(九蚊雞,應該平盡深水埗),拎返去問,竟然有客户服務部,個哥仔按幾按我部手機就得咗。九蚊雞都有咁好服務,可見生意難做。

李思行 - 2017年08月04日 18:31

Barwon 兄,簡單是美。

李思行 - 2017年08月04日 18:35

PBrega 兄,强國重有多人停留係Maslow's hierarchy最低一層。

李思行 - 2017年08月04日 18:46

喺香港sell機遇、發展,唔係人人都buy

文見亂 - 2017年08月04日 19:57

Congrats!思行兄,換了一個新女友(換機如換女友是正常的)。

 

文見亂 - 2017年08月04日 20:00

哈哈!

手機比女友更加不可沒有。

在現今社會你可以沒有女友,但不能沒有手機,真是多麼可怕。

李思行 - 2017年08月04日 20:16

文兄,我無抛棄舊女友㗎,依家前後五美相伴。嘻嘻 !

周容 - 2017年08月04日 22:17

文 兄好比喻!

 

機比女友難搞,對佢毫無保留,嘻嘻!

恭賀思行兄享齊人之福!

李思行 - 2017年08月04日 23:21

周容 兄,

手機同女友其實都係硬件同軟件如何配合嘅問題。嘻嘻 !

周容 - 2017年08月04日 23:56

唔怪得人地話大陸唔配套啦,真牙煙!嘻嘻!

只有登入後或登記成為會員才能發表意見

版規:

  1. 網站編輯或網站作家開題,網友可回應。回應必須貼題,請勿重覆;勿發表誹謗,人身攻擊或不雅內容。
  2. 網站編輯有權發表或不發表網友張貼的內容。(請參閱議論守則)
  3. 開題之網友可編輯其在過去7天內發表之論題,或刪除相關回應。

查閱 FAQ

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。