Chan David's 的頭像

獨立財經觀察兼操刀人。

咪前咪後

(一)

剛剛過去一週,咪前:

財演乙:美國的國債孳息率上升,看來預期通脹率會上升,咁,甲sir,金價會唔會颷升呢?

財演甲:呀乙女,睇落應該有機會突破1300USD/oz的關口,下一關挑戰1340USD/oz。

財演乙:但係,美聯儲就快換主席,會否另有影響?

財演甲:Powell屬鴿派,加息唔會咁急,通脹高,金價就會升,唔買就笨了。

咪後:

財演乙:甲蛇,剛剛在網上搜到下圖,點睇金價和美國CPI好似冇乜關係喎:

財演甲:阿妹,CPI呢D係人工數字,不是已經說了,叫你睇美國10年孳息率去預計通脹率嘛。

財演乙:But,阿甲蛇,另外有一幅圖,都顯示了美國10年債孳息率跟金價都冇乜關係喎… …點解既?

財演甲:嗱,阿妹,要這樣那樣,依樣果樣,咁樣咁樣解架(下删3000字,反正讀者沒有興趣)。

財演乙:唓,阿蛇,你咁解法,不如穿越返清朝做狀師算數啦。

(二)

當聯儲局開完會,出了議息結果,同時又收到消息,加泰隆尼亞獨派放軟立場,兼且德國社民黨肯跟基民聯商量組閣後,咪前:

財演乙:甲sir,剛剛似乎有點好消息,美國收水似乎唔會咁緊,而歐洲兩大不穩定因素又算係穩定下來,歐羅這兩天正大反彈,能否持續下去呢?

財演甲:阿乙女,睇落應該係可以持續幾硬啦。加上歐洲經濟復甦得唔錯,以及可能隨之而來加息的影響,歐羅既作為避險又作為高息(?)的貨幣,應該正過美元。再講,美國負債咁高,美元好難有運行啦。

咪後:

財演乙:剛剛有靚仔發了5張圖給我,2張係美國的debt和debt-to-GDP ratio跟金價(美元base)的關係;另2張係歐洲的debt和debt-to-GDP ratio跟金價(歐元base)的關係;最後一張比較EUR:USD匯率和EU及US負債比的關係。似乎負債的高低跟貨幣的強弱沒有多少關係喎。

財演甲:唔係丫,少少都係有關係丫,尤其係用負債跟GDP的比率跟金價計,做完線性回歸都有六成唔到的關係既。

財演乙:甲蛇,牽強D卦。

財演甲:有乜所謂?香港人金魚記憶,鬼會記得?再講,政治一日都嫌長,到時又有大把理由可以解畫啦。係呢,邊位靚仔send野俾你呢?

財演乙:嘻嘻,none of your business。

(三)

油組開完會後,咪前:

財演乙:啱啱油組和俄國達成再延長9個月石油減產協議,對油價和油股後續發展,甲sir有乜野睇法?

財演甲:咁好明顯,油價應該向好既。至於石油股…(下刪500字技術圖走勢和如何追落後,還有神奇的止賺及行貨的止蝕位)

財演乙:多謝大師。請問你有冇持有以上的股份?

財演甲:係冇既。

咪後:

財演乙:甲蛇,既然你都睇好,點解唔揸?

財演甲:唉,放早了,之後升到咁,冇位入。

財演乙:噢?

財演甲:總以為油組好,俄國也好,心底裡都係想賣多幾桶,始終會打茅波暗中增產搶生意,再加上歐美日韓甚至中國都講潔淨能源,油價和油股基礎上都冇支持啦,咪只係甚麼卡塔爾危機,甚麼制裁伊朗才炒翻轉,點知…現在唔上唔落,冇野好做。唉。

財演乙:呵呵呵。剛才又有靚仔發訊息給我啦。話基本同意甲蛇你對油價的睇法,但對原因和細節有保留,並且奇怪點解你冇落注。

財演甲:上次果個?介紹來識下好喎。

財演乙:Of course not! 收兵點會收一個。呢個係另一個。人地正經讀歷史架。佢話你地班中環友,幾十年都得一個框,就係以色列和沙地係美國既、伊朗係俄國和中國既、油王們都係烚既、恐怖份子係石頭爆出來既、石油公司淨係做石油既、油站賣油果間就係開採公司、油組自1973年後永遠只識增產既、北韓係痴線既。世界變啦!現在無論沙地、以色列、伊朗、還有其他成堆的中等國家,之間雖然也會競爭甚至大打出手,但有一樣共通點:沒有一個跟死一個老細,也沒有一個再死做石油。無論係埋堆,找projects,統統都係為一件事:籌期以發展其他經濟,鞏固荷包,派得到好處落民間,自己個王座才穩陣。石油公司也一樣,須籌期以做多方面嘗試,起碼形象上轉為能源公司。但正因為咁,油價唔可以太爛,唔係冇錢賺兼籌唔到期;但又唔可以太好,因為會令太多新手加入,分薄個餅喎。

財演甲:讀歷史既又會去睇政治同商品?阿妹頭,咪收錯兵喎。

財演乙:咁複雜既野,我識條iron咩,中環港女乍我。但係,人地揸石油股成年啦,阿蛇你冇喎。過咁多料俾你,請食飯啦!

【睇大睇細】- 陳大為

博客:http://forum.hkej.com/user/2971

作者電郵:[email protected]

Fb page: https://www.facebook.com/macandmic/?skip_nax_wizard=true

所有評論

Chan David - 2017年11月27日 12:01

美國的debt和Gold Price:

Chan David - 2017年11月27日 12:02

美國的debt-to-gdp ratio 和Gold Price:

 

Chan David - 2017年11月27日 12:03

EU的debt和Gold Price:

Chan David - 2017年11月27日 12:03

EU的debt-to-gdp ratio 和Gold Price:

Chan David - 2017年12月04日 11:25

剛剛才發現之前圖一錯誤,現已更正

只有登入後或登記成為會員才能發表意見

版規:

  1. 網站編輯或網站作家開題,網友可回應。回應必須貼題,請勿重覆;勿發表誹謗,人身攻擊或不雅內容。
  2. 網站編輯有權發表或不發表網友張貼的內容。(請參閱議論守則)
  3. 開題之網友可編輯其在過去7天內發表之論題,或刪除相關回應。

查閱 FAQ

信報簡介 | 服務條款 | 私隱條款 | 免責聲明 | 廣告查詢 | 信報會議中心租賃 | 加入信報 | 聯絡信報

股票及指數資料由財經智珠網有限公司提供。期貨指數資料由天滙財經有限公司提供。外滙及黃金報價由路透社提供。

本網站的內容概不構成任何投資意見,本網站內容亦並非就任何個別投資者的特定投資目標、財務狀況及個別需要而編製。投資者不應只按本網站內容進行投資。在作出任何投資決定前,投資者應考慮產品的特點、其本身的投資目標、可承受的風險程度及其他因素,並適當地尋求獨立的財務及專業意見。本網站及其資訊供應商竭力提供準確而可靠的資料,但並不保證資料絕對無誤,資料如有錯漏而令閣下蒙受損失,本公司概不負責。