世界非常「英特爾拉雄納爾」

2018年01月12日 03:21 (其他)

650

《信報》方如玉帥：林鄭話要對鄭若驊僭建包容對待，其實香港唔係咁多人想追殺佢，只要其他僭建人士都可以獲得包容對待就得。但僭建演變到唔只係太忙唔記得咗，開始懷疑是否存心隱瞞，再揭下去就變成麥齊光翻版。佢嘅位置係律政司司長，如果僭建法例專家唔知屋企有僭建，究竟佢點解可以做政府最高級嘅法律顧問？佢解到僭建呢關，解唔到點解仲有能力做律政司司長。呢鋪林鄭可以點攬鄭若驊而讓佢繼續有威信地做司長？要考姓鄭嘅政治功力。

Bitcoin交易禍福難料

Bitcoin在南韓同大陸被封殺，用電掘礦唔得，交易又唔得。佢哋封殺，掉轉頭就會有國家歡迎Bitcoin，開大門攞正牌，俾人掘礦兼自由買賣。南韓要禁交易所，日本就發牌俾交易所，世界將會一分為二。究竟係禁止加密貨幣嘅國家避過災難，還是歡迎加密貨幣嘅國家殺出血路？而家嘅世界非常「英特爾拉雄納爾」，南韓冇交易所，可以滙錢去美國交易，滙去日本亦得，除非南韓禁止人民滙錢去海外，否則禁無可禁。

加密貨幣背後嘅結構就係唔依靠任何中央機構，即係唔靠政府。政府可以禁止人民用國家貨幣換加密貨幣，但係禁止唔到人民用加密貨幣換加密貨幣。當柯達呢間曾經被科技蹂躪嘅公司都突然擁抱加密貨幣，投資銀行CEO都突然跑出嚟話後悔自己講錯嘢，就知道某啲政府視為邪惡嘅新科技結果，並唔係政府可以一廂情願可以消滅。你應該驚佢禁而避之則吉，還是估計遲早禁無可禁而率先入場？睇你智慧。

（節錄）

全文