大約晚上六㸃半繁忙時間,列車駛入金鐘站前突然煞停。一位背向車頭面向我,樣貌娟好、衣著光鮮,雖然拉住一個有轆細行李箱,但面形化妝髮型都令我覺得佢係日本人多過強國人嘅妙齡女子身體即時向後傾斜四十度。基於一個紳士嘅自然反應,我即刻伸出隻唔算強壯但尚有縛雞之力嘅右手緊緊地捉住佢嘅右手手腕;好彩我當時左手握住扶手無向前仆,避過一個尷尬兼可能令我有牢獄之災嘅場面出現,繼而可以對佢施以援手。

佢企定之後邊向我微笑邊張咀兩吓,由於當時大家都戴咗耳機,所以唔知佢用咩語言同我講"唔該";應該係講"唔該"或者"Thank You",除非唔係。

依家個問題係,雖然佢著嘅係長袖冷衫,我隻右手確實係有碰到佢右手手腕嘅肌膚,咁過得三五七年之後,佢會唔會喺網上話某年某月某個晚上喺地鐵被人救回一名,要報答佢㗎?

咩話,揸住佢隻手腕(避過一跌)唔算救回一命?

古時大夫幫小姐斷症打脈,隔塊竹簾或者紗簾之後再用條紅繩縛住小姐隻手腕都可以藥到回春,揸住隻手腕,重唔係救命恩人!

但我到站落車時佢都無問我“恩公高姓大名”,我係咪諗多咗?!

 

李思行面書

https://www.facebook.com/sixing.li [5]

 

《思行思語》專頁

https://www.facebook.com/%E6%80%9D%E8%A1%8C%E6%80%9D%E8%AA%9E-3492471985... [6]