適逢電影界一年一度盛會兼落咗畫一段時間至講,印象中,自有中港合拍片之後已經無(興趣)睇賀歲片。

想信係因為(今年二月中農曆年期檔)又有《西遊記》上畫,電視台(二月上旬)周日中午播映四年前嘅賀歲猛片《西遊記之大鬧天宮》。

頭十五分鐘,覺得製作水平唔錯,於是決定睇落去,但睇到一半多啲,發覺伏已中;原來大鬧天宮嘅唔係孫悟空,係牛魔王(去搵玉帝報仇)!

幕前所見,粒粒巨星。計有民間特首周潤發(玉皇大帝)、宇宙最強甄子丹(孫悟空)、舞台王者郭富城(牛魔王),榮獲多屆亞太區最受歡迎女歌手嘅陳慧琳(觀世音),其他尚有何潤東、梁詠琪。。。重有(新鮮出爐影帝)古天樂旁白。

至於幕後班底,據網上資料顯示,由攝影、化妝、視覺效果、特技、動作、布景等全部都係由荷里活一級班底(作品包括《神鬼奇航》、《斯巴達三百壯士》、《阿凡達》、《魔介》同《金鋼》)包辦。

單係上列演員同幕後團隊嘅酬金已經要七千萬港元!再加上其它製作費,絕對係名符其實嘅千萬(美)金元大製作。可惜「財大氣粗」,劇本不濟;最後更衰收尾,草草收場 - 完場前幾分鐘,仍然講緊孫悟空不敵牛魔王,但觀世音向孫悟空講咗兩句佛偈,孫悟空即刻「脱胎換骨」,不消兩招便反敗為勝,果然神怪!

劇本,一劇之本,寫得唔好,花幾多錢都係徒勞。

據知阿黃嘅《西遊記》重有第三集,大家拭目以待吧!

利申,今年二月上畫嘅第二集無睇。

講開又講,中國神怪故事之中,相信《西遊記》係被搬上銀幕/營光幕最多次數嘅一個故事(剛過去嗰十二個月就有三套),但《白蛇傳》就好似只得潘廸華姐姐同羅文先後搬上舞台,(香港)電影電視人就興趣不大(上世紀香港電視台應該拍過,近年就反而大陸有拍,香港就完全無)。

睇下面《水漫金山》一段歌詞,如果拍成電影,以今日電腦特技同後製技術水平嚟睇,畫面一定非常壯觀,視覺效果絶不比《西遊記》任何一段情節遜色。當然,劇本會唔會犯駁就係另一話題,亦要到時至知。

後記:原來2011年有套《白蛇傳說》,以「水漫金山」特技為賣點,但香港票房只得127萬,怪不得我完全無印象!

粵曲《水漫金山》選段:

(青)唉吔,天宮鼓響,天宮鼓響,不好了!

(青)從天降金盔銀甲鐵羅裳。
十八金剛五百羅漢;
六千羅剎八大天王。
九萬九千奎星將;
天龍八部怒翱翔。
吆喝聲嚇得我心魂俱喪; 

(白)看山崗不由得膽顫心寒。
那邊廂天將天兵布羅網;
神通各顯耀武揚。
這邊廂水族仙家勢雄壯;
排山倒海氣昻昻。
此際此時難退讓;
牙關咬緊上戰場。

(上面呢兩段描寫一眾仙家天兵天將出場已經夠曬「賓墟」)

(青)手握陰陽杖,
(白)與天鬥一場;
(青)雷騰雨降霧罩風張,
(白)魚蛇蟹蚌玳瑁鯊鯧,如虹氣勢;
(白、青)迎戰眾金剛,
(青)齊天大聖君,老君,武魁韋陀,聯陣對抗;
(白)哪吒共李靖震子,吼天犬,挽手施威法力強,
(青)九曜天神仙力高廣;
(白)蛇亡蝦傷勢弱難對抗,
(青)水族受摧殘沒法擋,
(白)揮刀執戈抵抗眾天罡;
青兒聽令,拔劍擎槍,殺上戰場!

按:初稿寫於今年三月

 

李思行面書

https://www.facebook.com/sixing.li [5]

思行思語https://www.facebook.com/%E6%80%9D%E8%A1%8C%E6%80%9D%E8%AA%9E-3492471985... [6]

大話西遊錢作怪https://www.facebook.com/349247198508841/photos/a.349385918494969.107374... [7]