《信報》方如玉帥:恒生指數收報28311點,跌370點,成交額959億。小米(01810 [4])報復式企穩19蚊,毋懼跌市,毋懼貿易戰。騰訊(00700 [5])都唔應該怕貿易戰,但都要跌1.9%。那證明股價要跌,與公司有無出口貨品到美國無關,只係同股東要唔要沽貨套現有關。如果股東唔等錢使,無沽貨壓力,股價係唔會跌。呢個世界,所有價錢都係反映供求,就係咁簡單。

繼小米之後,有大量新經濟股排隊等上市,正如我所講,香港成為呢類有創投基金撐腰企業嘅樂園。最近上市嘅公司已經有唔少無錢賺,但一啲大晒士嘅公司,有盈利、有資產嘅卻要平賣,什麼價值投資,通通都可以掉晒落垃圾桶。

在科網股年代,畢非德話看不懂科網股,唔敢買;佢又話錯過了亞馬遜,唔知道貝索斯(Jeff Bezos)咁厲害;佢重槌投資蘋果公司,成間買晒都得,但都只係最近嘅事,等蘋果成為一間好穩定、市值世界第一,P⁄E只係十多倍嘅超級企業。咁即係話,新經濟公司無盈利、無資產,估值又貴,從來唔係懂計數投資者那杯茶。今日你買中,未來可能成為另一隻騰訊,咁只係你好彩,唔係你好眼光。唔通你認為你叻過畢非德?

咁多唔賺錢嘅新經濟公司可以直闖香港上市,咁仲邊使買殼?以前好多馬字輩嘅項目借殼,就係新經濟公司,未賺錢,但一經借殼,就炒到飛天。炒到飛天先再批股供股集資,然後就在市場自由活動。而家唔使咁煩,直接上市,高估值,同股不同權,唔使畀原殼主分一杯羹。借殼沒有同股不同權,又沒有上市前送股票給創辦人,咁筍嘅選擇,難道懂得新經濟嘅天才會不懂得選擇?...(節錄)

全文 [6]