《信報》方如玉帥:蘋果係全世界唯一一間公司,發布產品也會成為新聞。最奇怪是並非劃時代產物,只係舊款升級,羨煞不少生意人。蘋果次次有發布會,例牌都係被批評冇新意,股價都係會跌一跌,最後又係大賣,市值仲超越埋一萬億美元。證明產品千祈唔好行得太前,只要進步少少,永遠在凡人觸手可及,又感覺到稍為改善了生活,就足以令人有意欲購買。

蘋果手機貴到離譜,等於一部MacBook,貴過好多電腦。其實iPhone就係一部小型電腦,寫字樓員工日常工作對住部電腦不停咁撳,攞住部iPhone其實已經可以開工。用iPhone寫稿已經多年,由倉頡打字時無法思考,變成而家用倉頡打字已經不用思考。返工有大部分時間是覆電郵,而家可以用手機覆電郵、WhatsApp、WeChat等等。用電腦嚟睇股價同落盤,而家用電話一樣做得晒。

所以,iPhone賣一部電腦的價錢,是絕對合理,佢唔單止提供了電腦嘅功能, 還有電腦先天缺乏的靈活性。iPhone愈出愈勁,寫字樓都要思考未來運作模式,是否要一人一張寫字枱,甚至是否要一個辦公室。

一機在手就可開工

當人人都攞部手機開工,寫字樓可能係擺幾張大梳化,讓員工半坐半躺寫電郵。既然搭巴士都可以用iPhone,咁上班時間並非9點正返到寫字樓,而係9點就要用iPhone打卡,開始開工。電話會議唔再需要發出dial-in number,知道對方手機,躺着都可視像會議。未來虛擬貨幣必定係可以付款嘅找數媒介,你搵外國人幫手做事,用iPhone聯絡,用虛擬貨幣付款,一人公司都可以係跨國企業,視線唔只放响大灣區,你能夠接觸的,是全世界。...(節錄)

全文 [4]