《信報》方如玉帥:《施政報告》,明日大愚。唔係,明日大嶼。將來沒有離島小輪,全部道路連接。未來20年都有大型基建項目,填海造島,鋪橋搭路,有排搞。未來香港GDP增長有保證,政府每年都狂使錢,香港一定可以維持數字上的經濟繁榮。

未來七成係公營房屋,賣價又同私人市場脫鈎,香港將會分化為兩個階層。事實上,香港人已經活在平衡時空,一係生活在夢幻之中,一係生活在地獄之中。唔只係睇你副身家有幾厚,仲睇你心胸有幾厚。凡事太執着,有錢都可以生活得好痛苦。

產婦先係《施政報告》最大受惠者,尤其是打政府工嘅產婦。前四後六變成前四後十,德政,不愧係女特首。以後起樓要有育嬰室,業主齊齊分擔一啲未必用得着嘅設施,相信都只有女特首先可以有咁細緻嘅政策。

未來香港最發嘅係建造業,發展商都未必有咁好賺。一萬億,十幾廿年嘅大基建,太肥美了。有細路,快啲叫佢去學紮鐵倒泥,包保有工開。香港未來唔再係金融中心,而係建造中心。金融中心,股票市場將無法養活咁多人,尤其是香港人。呢幾年香港人在股票市場是水尾,要快啲轉行。美國放寬了監管,令股市升完又升。香港愈管愈死,孖展收緊,核數師保留意見停牌,上市後生意逆轉,毫無出路,只可等除牌。...(節錄)

全文 [5]