《信報》投資者日記:11月8日,周四。德州儀器早前預警晶片需求可能放緩,市場本來已經開始擔心,聽完更加驚。有位跟蹤科技股幾十年,經驗老到的評論員,認為市場大驚小怪。因為晶片業具強周期性,每次當主流電子產品成熟,而生產商未能推出熱門新產品,需求就會放緩,從上世紀六十年代行業誕生開始,周而復始,一直如此。所以行業整體股價調整,毋須多慮,應該視為機會。
 

人工智能、IoT、自駕車等等未來大趨勢,早晚會為晶片商帶來下一輪爆發性需求,長遠前景依然秀麗,放心買。不但要買德州儀器,高位回落超過三成的Micron亦不容錯過,因為公司的記憶晶片,同樣會受惠上述各大科技趨勢帶動的下一個超級周期。

賺變蝕信心動搖

每次讀這類冷靜分析,內心其實充滿疑惑,因為往往講就無敵,做就無力,化作行動需要配合好多因素,困難得多。而且人不是機器,人心肉做,先前的牛市中,會過度興奮,投資者可能入咗貴貨。股價下挫,有盤的話,每天好似在擂台上挨打,左一拳,右一拳,信心難免會受損,情緒偏向負面。個心更加緊張是否應該趁反彈離場,在哪個價位減磅。加碼?咪玩啦。

妥善處理好經濟與行業周期性,工夫非常磨人。好景時,股價一路狂飆,自然抱緊貨,不願隨便沽,反而會更加留意增持機會。走勢出現明顯逆轉,本來賺錢的盤位變成蝕,信心自然會動搖,開始擔心低處未算低。就以Micron為例,上次科網股災,一度失去八九成市值,怕歷史重演正常不過。

況且科技股近期大幅回調,雖然有反彈,但銳氣已經失咗。以往一堆精神支柱,現在都搖搖擺擺,推車仔去掃貨,是否有點早?Nvidia食正所有科技大趨勢,幾個星期前依然紅過炸子雞,轉眼跌兩三成。.....(節錄)
 
全文 [5]